چراغ ابھی روشن ہے

 

چراغ ابھی روشن ہے

اس شہر میں اسے آئے ہوئے کئی برس گزر چکے تھے۔

ابتدا میں وہ یہاں اجنبی تھا۔ چند گلیاں، چند نئے چہرے، چند رسمی ملاقاتیں—بس اتنا ہی تعلق تھا۔ مگر وہ ان لوگوں میں سے نہیں تھا جو کسی جگہ صرف رہتے ہیں۔ جہاں اس کا گھر بنتا، وہاں آہستہ آہستہ اس کا دل بھی بسنے لگتا۔

اس نے یہاں بھی وہی کیا جو وہ ہمیشہ سے کرتا آیا تھا۔

کسی بچے کو پڑھائی میں مدد چاہیے ہو تو وہ موجود ہوتا۔ نوجوانوں کے لیے کوئی سرگرمی ہو تو سب سے پہلے ہاتھ بڑھاتا۔ والدین کے لیے کوئی نشست ہو تو انتظام میں لگ جاتا۔ کسی اجتماعی کام کے لیے لوگوں کو اکٹھا کرنا ہو تو وہ خاموشی سے دروازے کھٹکھٹاتا۔

اسے کبھی یہ خیال نہیں آیا کہ وہ کوئی بڑا کام کر رہا ہے۔

اس کے نزدیک خدمت کا مطلب ہی یہ تھا کہ جہاں ضرورت نظر آئے، وہاں خود کو حاضر کر دیا جائے۔

شاید اسی لیے اس نے کبھی یہ حساب بھی نہیں رکھا کہ اس نے کتنا وقت دیا، کتنی سرگرمیوں میں حصہ لیا، کتنے لوگوں کے ساتھ بیٹھا یا کتنی بار اپنا کام چھوڑ کر کسی اور کے کام آیا۔

وہ بس کرتا رہا۔

اور کرتے کرتے ایک دن اسے احساس ہوا کہ وہ اس جگہ میں اجنبی نہیں رہا۔

اس نے یہاں اپنا گھر بنا لیا تھا۔

صرف اینٹوں اور پتھروں کا نہیں۔

لوگوں کے درمیان۔

پھر ایک دن، کئی برس بعد، ایک معمولی سا واقعہ پیش آیا۔

بظاہر معمولی۔

اتنا معمولی کہ شاید کسی دوسرے شخص کے لیے چند لمحوں کی تلخی سے زیادہ کچھ نہ ہوتا۔

مگر بعض واقعات اپنی شدت سے نہیں، اپنی جگہ سے انسان کو توڑتے ہیں۔

وہ ایک بڑے اجتماعی دن کے بعد لوگوں کے ہجوم میں گھر کی طرف جا رہا تھا کہ اچانک ایک شخص نے اس کا راستہ روک لیا۔

چند سخت الفاظ۔

کچھ ایسا لہجہ جس کی اسے توقع نہیں تھی۔

اور چند لمحوں کے لیے وہ وہیں کھڑا رہ گیا۔

اسے غصے سے زیادہ حیرت ہوئی۔

اس لیے نہیں کہ دنیا میں بدتمیز لوگ نہیں ہوتے۔

بلکہ اس لیے کہ اسے یقین تھا کہ یہاں ایسا نہیں ہوگا۔

وہ اس جگہ کو اپنا سمجھتا تھا۔

اور شاید دل کی گہرائی میں یہ بھی سمجھتا تھا کہ جس کمیونٹی کے لیے انسان برسوں خلوص سے کام کرے، وہاں اگر کوئی اختلاف بھی ہو تو کم از کم عزت کا دامن ہاتھ سے نہیں چھوٹے گا۔

مگر اس دن دامن چھوٹ گیا۔

وہ خاموشی سے واپس آیا۔

اس نے شور نہیں کیا۔

کسی کو برا بھلا نہیں کہا۔

صرف اس واقعے کی تمام تفصیلات ان لوگوں تک پہنچا دیں جنہیں وہ اس معاملے کو دیکھنے کا اہل سمجھتا تھا۔

پھر انتظار شروع ہوا۔

ایک مہینہ گزر گیا۔

کوئی جواب نہیں آیا۔

دوسرا مہینہ آیا اور گزر گیا۔

پھر تیسرا۔

خاموشی اپنی جگہ قائم رہی۔

وہ ہر گزرتے دن کے ساتھ ایک عجیب سوال اپنے اندر اٹھتا محسوس کرتا:

"کیا واقعی کسی نے محسوس نہیں کیا کہ میرے ساتھ کچھ ہوا ہے؟"

پھر ایک اور سوال آیا:

"یا شاید کسی نے محسوس کیا، مگر کسی کو پوچھنے کی ضرورت محسوس نہیں ہوئی؟"

اس نے کسی سے کچھ نہیں کہا۔

بس آہستہ آہستہ پیچھے ہٹنے لگا۔

پہلے ایک سرگرمی سے۔

پھر دوسری سے۔

پھر ایک دن اس نے وہ کمیٹی بھی چھوڑ دی جس کا حصہ رہ کر وہ برسوں کام کرتا رہا تھا۔

لوگوں نے شاید اس کی غیر موجودگی محسوس کی۔

وہ جانتا تھا کہ محسوس کی۔

مگر عجیب بات یہ تھی کہ کسی نے اس سے پوچھا نہیں:

"تم اچانک اتنے خاموش کیوں ہوگئے؟"

اور کبھی کبھی انسان کو انصاف سے پہلے صرف ایک سوال چاہیے ہوتا ہے۔

ایک سادہ سا سوال۔

"کیا ہوا ہے؟"

مگر وہ سوال نہیں آیا۔

وقت گزرتا گیا۔

ایک سال۔

پھر دوسرا۔

وہ اب بھی اسی شہر میں رہتا تھا۔

وہی سڑکیں تھیں۔

وہی لوگ تھے۔

وہی کمیونٹی تھی۔

اس کا گھر بھی وہیں تھا۔

مگر اس کے اندر کچھ بدل چکا تھا۔

اس نے خدمت کرنا نہیں چھوڑا تھا۔

یہ بات شاید سب سے کم لوگوں نے سمجھی۔

وہ آج بھی کسی دوسری جگہ جاتا، نوجوانوں کے ساتھ بیٹھتا، بچوں کے لیے کچھ کرتا، کسی پروگرام میں ہاتھ بٹاتا، کسی ضرورت مند کے کام آتا۔

وہ چراغ جو برسوں سے اس کے اندر جل رہا تھا، وہ اب بھی روشن تھا۔

بس اس نے ایک جگہ اس چراغ کو جلانا چھوڑ دیا تھا۔

ایک شام وہ ایک چھوٹے سے اجتماع سے واپس آ رہا تھا۔ وہاں اس نے چند نوجوانوں کے ساتھ کئی گھنٹے گزارے تھے۔ جاتے ہوئے ایک لڑکے نے اس کا ہاتھ پکڑ کر کہا تھا:

"آپ اگلی بار بھی آئیں گے نا؟"

وہ مسکرایا تھا۔

"ہاں، کیوں نہیں۔"

راستے میں اسے اچانک خیال آیا کہ شاید انسان کا کام ہر دروازے پر روشنی کرنا نہیں ہوتا۔

کچھ دروازے بند بھی ملتے ہیں۔

کچھ جگہیں خاموش بھی رہتی ہیں۔

اور کچھ لوگ آپ کے خلوص کو سمجھ نہیں پاتے۔

مگر اس کا مطلب یہ نہیں کہ چراغ بجھا دیا جائے۔

چراغ کا کام روشنی دینا ہے۔

جہاں روشنی کی قدر نہ ہو، وہاں چراغ کو زبردستی جلائے رکھنا بھی ضروری نہیں۔

کبھی کبھی اسے اٹھا کر آگے بڑھ جانا چاہیے۔

وہ چلتا رہا۔

اس کے پیچھے شہر کی روشنیاں تھیں۔

آگے بھی کچھ گھر تھے۔

کچھ اجنبی چہرے تھے۔

کچھ نئے بچے تھے۔

کچھ نوجوان تھے جنہیں شاید کسی ایسے شخص کی ضرورت تھی جو ان سے کہے:

"چلو، کچھ کرتے ہیں۔"

وہ مسکرایا۔

اور آگے بڑھ گیا۔

کیونکہ اس نے ایک بات سیکھ لی تھی:

خدمت ختم نہیں ہوئی تھی۔
صرف راستہ بدل گیا تھا۔

اور چراغ؟

چراغ ابھی روشن تھا۔

رجاکی سے رضاکاری تک

رجاکی سے رضاکاری تک

ایک لفظ، ایک تاریخ اور اجتماعی شعور کا سفر

درویش کریم،  وادی ہنزہ

کبھی کبھی ہماری زبان میں کچھ ایسے الفاظ زندہ رہ جاتے ہیں جن کے پیچھے ایک پوری تاریخ دفن ہوتی ہے۔ ہم انہیں روزمرہ زندگی میں بے تکلف استعمال کرتے رہتے ہیں، مگر شاید ہی کبھی رک کر سوچتے ہیں کہ یہ لفظ کہاں سے آیا، اس کا اصل مفہوم کیا تھا، اور وقت کے ساتھ اس کے معنی میں کیا تبدیلی آئی۔ بروشسکی زبان  کا ایک لفظ    رجاکی بھی شاید ایسا ہی ایک لفظ ہے۔

گلگت بلتستان، بالخصوص ہنزہ نگر کے معاشرتی تناظر میں رجاکی ایک عام  اصطلاح ہے۔ آج اگر کسی گاؤں میں نہر کی صفائی کا کام ہو، کسی عبادت خانے کی تعمیر و مرمت کا مرحلہ درپیش ہو، راستہ بنانا ہو، برف ہٹانی ہو یا کوئی اور اجتماعی نوعیت کا کام ہو، تو لوگ اسے عموماً رجاکی ہی کہتے ہیں۔  بظاہر اس میں کوئی قباحت نہیں۔ یہ ہماری اجتماعی زندگی کا ایک خوبصورت پہلو بھی معلوم ہوتا ہے کہ لوگ اپنے ذاتی مفادات سے بالاتر ہو کر اجتماعی ضرورت کے لیے وقت، محنت اور وسائل فراہم کرتے ہیں۔  لیکن سوال یہ ہے کہ کیا رجاکی واقعی اس جذبے کی درست ترجمانی کرتا ہے؟  شاید نہیں۔

مقامی تاریخی روایت اور بعض تحقیقی حوالوں سے یہ بات سامنے آتی ہے کہ ہنزہ کے قدیم سماجی و سیاسی نظام میں رجاکی کا تعلق ایسے اجتماعی یا لازمی مشقت کے نظام سے تھا جس میں لوگوں کو حکمران یا میر کے مفاد، زمین یا ریاستی ضرورت کے تحت کام کے لیے بلایا جاتا تھا۔ بعض مطالعات اسے باقاعدہ جبری و اجتماعی مشقت کے طور پر بیان کرتے ہیں۔

یعنی اس کام میں اجتماعیت تو تھی، مگر اختیار شاید نہیں تھا۔ لوگ اکٹھے ہوتے تھے، کام کرتے تھے، محنت کرتے تھے، لیکن اس لیے نہیں کہ انہوں نے اپنی مرضی سے کسی اجتماعی مقصد کو قبول کیا تھا؛ بلکہ اس لیے کہ ایسا کرنا ان کی ذمہ داری، مجبوری یا حکومتی تقاضا تھا۔

یہاں ایک بنیادی فرق پیدا ہوتا ہے۔ اجتماعی کام اور رضاکارانہ اجتماعی خدمت ایک ہی چیز نہیں۔ 

آج ہم جب اپنے گاؤں کی نہر صاف کرنے کے لیے اکٹھے ہوتے ہیں، مسجد کی تعمیر کے لیے اینٹیں اٹھاتے ہیں، کسی کمیونیٹی ہال کی مرمت کے لیے چندہ دیتے ہیں، راستہ بناتے ہیں یا کسی قدرتی آفت میں ایک دوسرے کے گھروں تک مدد کے لیے  پہنچتے ہیں تو اس عمل کی اصل روح رضامندی، باہمی تعاون اور اجتماعی ذمہ داری  ہوتی ہے۔ مگر ہم اسے اب بھی رجاکی  ہی کہتے ہیں۔ شاید یہاں ہمیں تھوڑا سا رک کر سوچنے کی ضرورت ہے۔

ایک لفظ، دو مختلف زمانے ۔   دلچسپ بات یہ ہے کہ وقت گزرنے کے ساتھ رجاکی کے مفہوم میں ایک اور تبدیلی بھی آئی ہے۔  آج ہماری روزمرہ زبان میں اگر کوئی شخص کسی کام کو دل سے نہ کرے، ٹال مٹول کرے، مجبوری کے حالت میں  کرے یا بادلِ نخواستہ کسی کام میں شریک ہو تو بھی کہا جاتا ہے کہ  "یہ تو رجاکی کر رہا ہے"۔ گویا لفظ کے اندر کہیں نہ کہیں مجبوری، بے دلی اور ناگواری کا مفہوم اب بھی زندہ ہے۔

پھر یہی لفظ ہم اس وقت بھی استعمال کرتے ہیں جب پورا گاؤں کسی اجتماعی فلاحی کام کے لیے رضاکارانہ طور پر اکٹھا ہو۔  یہاں ایک عجیب سا معنوی تضاد پیدا ہوتا ہے۔

ایک طرف رجاکی = مجبوری سے کیا جانے والا کام ، اور دوسری طرف رجاکی = اپنی خوشی سے اجتماعی بھلائی کے لیے کیا جانے والا کام۔  تو سوال یہ نہیں کہ ہمارا اجتماعی کام غلط ہے۔ بلکہ سوال صرف یہ ہے کہ کیا اس خوبصورت جذبے کے لیے ہمارے پاس اس سے بہتر  کوئی لفظ نہیں ہونا چاہیے؟

یہ بات بھی اہم ہے کہ رجاکی کے تاریخی پس منظر میں اگرچہ جبر یا لازمی مشقت کا عنصر موجود تھا، لیکن اس روایت نے مقامی معاشرے میں اجتماعی تعاون کی ایک ایسی صلاحیت بھی پیدا کی جس کی جھلک آج تک دیکھی جا سکتی ہے۔ ہنزہ کے روایتی آبپاشی نظام، نہروں اور مشترکہ آبی وسائل کی دیکھ بھال میں اجتماعی محنت کا کردار  اہم رہا ہے۔  جدید مطالعات بھی  رجاکی کو ہنزہ میں مشترکہ وسائل کے انتظام اور ایک مقامی روایت کے طور پر بیان کرتے ہیں۔ اور شاید ہماری اجتماعی تہذیب کی سب سے بڑی خوبصورتی  بھی یہی ہے  

پہاڑوں میں زندگی کبھی آسان نہیں رہی۔ پانی لانا، نہریں بنانا، زمین آباد کرنا، راستے تعمیر کرنا، برف ہٹانا اور قدرتی آفات کا مقابلہ کرنا،یہ سب کام ایک فرد کے بس کی بات نہیں تھے۔ یہاں "میں" سے زیادہ "ہم" اہم تھا۔ شاید اسی لیے اجتماعی محنت ہماری سماجی ساخت کا حصہ بنی۔ مگر آج ہمارے پاس ایک موقع ہے، ہم اس اجتماعی روح کو برقرار رکھتے ہوئے اس کے نام اور مفہوم کو بھی اپنے موجودہ شعور کے مطابق ازسرنو بیان کر سکتے ہیں۔

میرے خیال میں ہمیں"رجاکی" کے بجائے   "رضاکاری"  جیسے  کسی اور متعلقہ لفظ پر غور کرنا چاہیے۔  فرق صرف ایک لفظ کا نہیں، ایک سوچ کا ہے۔ رجاکی میں اگر ماضی کی مجبوری کی بازگشت ہے تو رضاکاری میں اختیار ہے۔ رجاکی میں حکم کی تعمیل کا تصور ہوسکتا ہے تو رضاکاری میں شعوری انتخاب ہے۔  رجاکی میں "مجھے کرنا پڑے گا " ہوسکتا ہے تو رضاکاری  میں "میں کرنا چاہتا ہوں" کی  کیفیت ہے۔  اور یہی فرق کسی بھی زندہ معاشرے کی اصل طاقت بنتا ہے۔

اگر میں اپنے گاؤں کی نہر صاف کرنے جاتا ہوں کیونکہ مجھے ڈر ہے کہ اگر میں نہ گیا تو لوگ کیا کہیں گے، تو یہ محض اجتماعی دباؤ ہے۔ لیکن اگر میں اس لیے جاتا ہوں کہ مجھے احساس ہے کہ یہ نہر صرف میرے پڑوسی کے گھر تک پانی نہیں پہنچاتی، بلکہ میرے پورے گاؤں کی زندگی سے جڑی ہوئی ہے، تو یہ رضاکاری ہے۔ یہی فرق ہمیں اپنی نئی نسل کو سمجھانے کی ضرورت ہے۔

 لفظ بدلنے سے کیا ہوگا؟ کوئی یہ سوال بھی اٹھا سکتا ہے کہ آخر ایک لفظ بدلنے سے کیا فرق پڑے گا؟

بہت فرق پڑ سکتا ہے۔ الفاظ صرف گفتگو کا ذریعہ نہیں ہوتے؛ الفاظ ہمارے خیالات، رویوں اور اجتماعی شعور کو بھی تشکیل دیتے ہیں۔ اگر ہم کسی بچے سے کہیں کہ "کل رجاکی ہے، سب کو جانا ہے"   تو ممکن ہے اس کے ذہن میں ایک ایسا کام آئے جسے اسے کرنا ہی پڑے گا۔  لیکن اگر ہم کہیں  کہ "کل ہمارے گاؤں کی رضاکارانہ اجتماعی خدمت ہے، سب مل کر نہر صاف کریں گے"  تو پیغام بدل جاتا ہے۔ اب وہ کام محض ایک ذمہ داری نہیں رہتا؛ وہ شراکت بن جاتا ہے۔ وہ صرف مشقت نہیں رہتا؛ وہ خدمت بن جاتا ہے۔ اور وہ صرف حکم کی تعمیل نہیں رہتا؛ وہ اجتماعی ملکیت کا احساس بن جاتا ہے۔  

 ہمیں اپنی روایات کو ختم نہیں کرنا چاہیے۔ بلکہ ہمیں اپنی روایات کے اندر چھپی ہوئی خوبصورتی کو تلاش کرنا چاہیے اور جو چیز وقت کے ساتھ اپنی معنویت کھو چکی ہو، اسے نئے شعور کے ساتھ بیان کرنا چاہیے۔ ہمارے بزرگوں نے مل کر نہریں بنائیں، راستے بنائے، زمینیں  آباد کیں، ایک دوسرے کے مشکل وقت میں ساتھ دیا، اور  یہ سب کچھ  انہوں نے اس لیے کیا کیونکہ وہ جانتے تھے کہ پہاڑوں میں کوئی فرد اکیلا زندہ نہیں رہ سکتا۔ اجتماع میں  ہی طاقت تھا۔ آج حالات بدل گئے ہیں۔ ہماری ضروریات بدل گئی ہیں۔ ہمارے وسائل بدل گئے ہیں۔ ہمارے پاس مشینیں ہیں، ادارے ہیں، حکومتیں ہیں اور جدید سہولیات ہیں۔ لیکن ایک چیز آج بھی اتنی ہی اہم ہے اور وہ ہے  کہ "ایک دوسرے کے لیے  ضرورت پہ کھڑے ہونے کا جذبہ"۔ اس جذبے کو زندہ رکھنے کے لیے ہمیں شاید "رجاکی" کی نہیں، بلکہ ایک ایسے تصور کی ضرورت ہے جو اختیار، محبت، خدمت اور اجتماعی ذمہ داری کو یکجا کرے۔     یہ بھی ضروری ہے کہ ہم ماضی کے کسی لفظ کو محض اس لیے رد نہ کردیں کہ اس کا تاریخی پس منظر مشکل یا متضاد رہا ہے۔

رجاکی ہماری اجتماعی تاریخ کا حصہ ہے۔ اسے مٹانے کی ضرورت نہیں۔ اسے سمجھنے کی ضرورت ہے۔ ہم اسے تاریخ کے ایک اہم ورثے کے طور پر محفوظ رکھ سکتے ہیں، اس پر تحقیق کر سکتے ہیں، اپنے بچوں کو اس کے تاریخی پس منظر سے آگاہ کر سکتے ہیں اور یہ بتا سکتے ہیں کہ کس طرح ایک ہی روایت وقت کے ساتھ مختلف معنی اختیار کرتی رہی۔

لیکن جب ہم آج کی رضاکارانہ اجتماعی خدمت کی بات کریں تو شاید رجاکی کے بجائے کوئی ایسا لفظ استعمال کرنا زیادہ مناسب ہوگا جو ہمارے موجودہ اجتماعی شعور کی ترجمانی کرے۔ یا شاید  بروشسکی زبان سے  ہی ایسا کوئی  خوبصورت لفظ دریافت کیا جائے جو اس جذبے کو زیادہ بیان کر سکے۔

  آخر میں، شاید اصل سوال یہ نہیں کہ  ر جاکی کہنا ہے یا نہیں کہنا؟   اصل سوال یہ ہے کہ "ہم اپنی آنے والی نسل کو اجتماعی خدمت کا کون سا تصور دینا چاہتے ہیں؟"  کیا ہم چاہتے ہیں کہ وہ اجتماعی کام کو ایک ایسی ذمہ داری سمجھیں جو انہیں کسی کے حکم پر، دباؤ میں یا بادلِ نخواستہ کرنی ہے؟ یا ہم چاہتے ہیں کہ وہ یہ سمجھیں کہ یہ میرا گاؤں ہے، یہ میری نہر ہے، یہ میری مسجد ہے، یہ میرا جماعت خانہ ہے، یہ میرا راستہ ہے، اور اس کی بہتری میں میرا حصہ بھی ہے۔ اگر دوسرا تصور ہمارا مقصد ہے تو پھر شاید ہمیں اپنی زبان میں بھی اس کے لیے ایک نیا شعوری راستہ بنانا ہوگا۔

رجاکی شاید ہمارے ماضی کی ایک یاد ہے؛ رضاکاری  جیسا کوئی لفظ ہمارے مستقبل کا ایک انتخاب ہوسکتی ہے۔ اور شاید یہی وہ سفر ہے جس کی ہمیں ضرورت ہے، مجبوری سے اختیار تک، حکم سے شعور تک، مشقت سے خدمت تک، اور رجاکی سے رضاکاری تک۔ کیونکہ کسی معاشرے کی اصل ترقی صرف اس وقت نہیں ہوتی جب لوگ مل کر کام کریں؛

اصل ترقی اس وقت ہوتی ہے جب لوگ مل کر کام کرنے کو اپنا حق، اپنی ذمہ داری اور اپنی خوشی سمجھنے لگیں۔

نفرت کی بجائے محبت کو پروان چڑھائیں

 

نفرت کی بجائے محبت کو پروان چڑھائیں

میں،  درویش کریم اپنے قریبی فیملی کے تمام افراد کے سامنے اپنا ایک مشاہدہ پیش کرنا چاہتا ہوں۔ یہ محض میرا نقطہ نظر ہے اور ہو سکتا ہے کہ یہ مکمل طور پر درست نہ بھی  ہو، لیکن میں نے سوچا کہ اسے آپ سب کے ساتھ شئیر کروں۔ ہم اکثر دیکھتے ہیں کہ ہر گھر میں وقتاً فوقتاً مختلف واقعات پیش آتے  رہتے ہیں۔ کبھی خوشی کے لمحات ہیں تو کبھی ناچاقی کے۔ یہ کوئی غیر معمولی  یا انہونی بات نہیں ہے، بلکہ یہ سب زندگی کا حصہ ہیں۔ خوشی اور غم، دونوں ہی ہر دور میں آتے رہے ہیں اور آتے رہیں گے۔

خوشی کے لمحات سے تو ہر کوئی لطف اندوز ہوتا  ہی ہے، لیکن جب  (اللہ نہ کرے)  کبھی ناچاقی ہوجاتی  ہے تو ہم اکثر اسے اپنے  دل پر لے لیتے ہیں اور اسے زندگی بھر کا روگ بنا لیتے ہیں۔ ہم اس ناچاقی میں ملوث رشتہ داروں کو ہمیشہ بری نگاہوں سے دیکھتے ہیں اور ان کی باتوں کو دل میں بسائے رکھتے ہیں۔ یہاں تک کہ ہم ان واقعات کا تذکرہ اپنے بچوں سے بھی کرتے ہیں، جو بعض اوقات اس ناچاقی کے وقت پیدا بھی نہیں ہوئے ہوتے ہیں۔ اس طرح ہم اپنے دل میں پالی ہوئی کدورت کو اپنی اگلی نسل تک منتقل کر دیتے ہیں اور ان کے ذہنوں کو بھی  ان رشتہ داروں کے حوالے سے منفی جذبات سے آلودہ کر لیتے ہیں۔

نتیجتاً، ہم رشتوں سے لطف اندوز ہونے کے بجائے نسل در نسل نفرت اور دوری کو پروان چڑھاتے ہیں۔ ساس، سسر، میاں ، بیوی،بہو، بھابھی، دیور، دیورانی، ماموں، ممانی، خالہ، خالو، پھوپھی، پھوپھا ، بھانجے ، بھانجیاں، بتیجا، بتیجیاں اور اسطرح  کے دیگر رشتوں کو ہم اس قدر نظر انداز کر دیتے ہیں کہ بعض اوقات ایسا لگتا ہے ہم ایک دوسرے کے رشتہ دار نہیں، بلکہ دشمن ہیں اور اجنبی ہیں۔ حالانکہ رشتے زندگی کا قیمتی سرمایہ ہیں۔ یہ رشتے ہمیں جوڑتے ہیں، ہماری خوشیوں اور غموں میں شریک ہوتے ہیں اور ہماری زندگی کو بامعنی بنا  دیتے ہیں۔

آخر میں، میری آپ سب سے گزارش ہے کہ رشتوں کی قدر  کرنا شروع کریں اور انہیں سنبھال کر رکھنے کی کوشش کریں۔ اگر کوئی ناچاقی ہو بھی جائے تو اسے اپنی حد تک محدود رکھیں، اور کوشش کریں کہ وہ ناچاقی دل سے نکال سکیں۔ میری گزارش ہے کہ براہ کرم اپنی اولاد کے ذہنوں کو رشتوں کے بارے میں منفی خیالات سے آلودہ نہ کریں۔ اپنے بچوں کو رشتوں کی اہمیت سکھائیں، محبت اور معافی کا سبق دیں، تاکہ وہ ایک مثبت اور خوشحال مستقبل کی طرف بڑھ سکیں۔ آئیے مل کر نفرت کے بجائے محبت اور رشتوں کی گرمجوشی کو فروغ دیں۔ آپ سب کا بہت شکریہ۔

اگست ۱۹، ۲۰۲۵

حالیہ سیلاب کی تباہ کاریاں اور متبادل سڑکوں اور پلوں کی اہمیت

 

حالیہ سیلاب کی تباہ کاریاں اور متبادل سڑکوں اور پلوں کی اہمیت

تحریر: درویش کریم

پورا گلگت بلتستان 2025 کے مون سون سیزن اور گلیشیئرز کے پگھلنے کی وجہ سے شدید سیلابی صورت حال سے متاثر ہے، جس نے جگہ جگہ پر تباہی مچائی ہے۔ جولائی کے وسط سے شروع ہونے والی یہ سیلابی صورت حال گلگت بلتستان کے مختلف علاقوں کو متاثر کر رہی ہے۔ ان سیلابوں کی تباہ کاریوں کی وجہ سے اب تک درجنوں افراد ہلاک ہو چکے ہیں، زرعی زمینیں، مکانات، اور انفراسٹرکچر جن میں نہریں، سڑکیں اور پل شامل ہیں، تباہ ہو چکے ہیں۔ لاکھوں ایکڑ زرعی زمین برباد ہو چکی ہے، اور معیشت کو اربوں روپے کا نقصان پہنچا ہے۔ 

اس طرح کے حالات میں دیکھا گیا ہے کہ رابطہ سڑکیں اور پل علاقے کی ریڑھ کی ہڈی کی حیثیت رکھتے ہیں، خاص طور پر گلگت بلتستان جہاں جغرافیائی مشکلات اور دور دراز علاقے موجود ہیں۔ یہ نہ صرف لوگوں کی آمد و رفت کو آسان بناتے ہیں بلکہ معیشت، تجارت، سیاحت، اور ضروری اشیاء کی سپلائی کے لیے ناگزیر ہیں۔ گلگت بلتستان میں، جہاں سیاحت بنیادی ذریعہ معاش ہے، سڑکیں اور پل سیاحوں کو پہنچانے اور مقامی مصنوعات کو مارکیٹ تک لانے اور لے جانے کا واحد ذریعہ ہیں۔ پل دریاوں اور نالوں کو عبور کرنے میں مدد دیتے ہیں، جو سیلاب یا قدرتی آفات کے وقت لائف لائن کا کام کرتے ہیں۔ ان کی عدم موجودگی سے نہ صرف اقتصادی سرگرمیاں رک جاتی ہیں بلکہ ہنگامی طبی امداد، خوراک کی ترسیل، اور تعلیم تک رسائی متاثر ہوتی ہے۔ جدید انفراسٹرکچر کی موجودگی سے علاقائی ترقی ممکن ہوتی ہے، جبکہ یہ روزگار کے مواقع بھی پیدا کرتے ہیں۔ مجموعی طور پر، پکی سڑکیں اور مضبوط پل قومی اتحاد اور ترقی کی علامت    سمجھی جاتی ہیں، جو دور دراز علاقوں کو مرکزی شہروں سے جوڑنے کے سبب بنتی ہیں۔ 

جب سڑکیں اور پل سیلاب کی نذر ہو جاتے ہیں تو لوگوں کو شدید مشکلات کا سامنا کرنا پڑتا ہے۔ سب سے بڑی تکلیف آمد و رفت کی بندش ہے، جس سے لوگ اپنے گھروں میں پھنس جاتے ہیں اور ضروری اشیاء جیسے ادویات، خوراک، اور ایندھن تک رسائی نہیں ملتی۔ کچھ علاقوں میں، جہاں صرف ایک سڑک موجود ہو اور اگر یہ سڑک بہہ جائے تو ہزاروں سیاح اور مقامی لوگ پھنس جاتے ہیں، جس سے معاشی نقصان ہوتا ہے۔ طبی ہنگامی صورتحال میں مریضوں کو ہسپتال پہنچانا ناممکن ہو جاتا ہے، جو ہلاکتوں کی تعداد بڑھنے کا سبب بن جاتے ہیں، بچے سکول نہیں جا سکتے، کسان اپنی پیداوار مارکیٹ تک نہیں پہنچا سکتے، اور کاروبار بند ہو جاتے ہیں۔ سیلاب زدہ علاقوں میں، لوگوں کو اپنے گھر چھوڑ کر محفوظ مقامات پر منتقل ہونا پڑتا ہے، جو نقل مکانی کی وجہ سے نفسیاتی دباؤ کا باعث بنتا ہے۔ یہ تکلیفیں خاص طور پر غریب اور دیہی علاقوں کے لوگوں کو متاثر کرتی ہیں، جو پہلے ہی وسائل کی کمی کا شکار ہوتے ہیں۔ 

مثال کے طور پر حسن آباد ہنزہ میں ششپر گلیشیئر کے پگھلنے سے آنے والے سیلاب نےقراقرم ہائی وے کا ایک بڑا حصہ بہا لے گیا، جس سے گلگت اور ہنزہ کے درمیان مرکزی شاہراہ منقطع ہو گئی۔ تاہم، سمائر، اسقرداس، اور شاہ یار نگر کی سڑک، جو اس وقت متبادل راستے کے طور پر استعمال ہو رہی ہے، کی بدولت لوگوں کی آمد و رفت میں کافی آسانی پیدا ہوئی ہے۔ یہ متبادل راستہ، جو نگر کی طرف سے گزرتا ہے، ٹریفک کو ڈائیورٹ کرنے میں مدد فراہم کر رہا ہے۔،  جس سے سیاحوں اور مقامی لوگوں کو سفر جاری رکھنے کا  سہولت میسر ہوا ہے۔ اسی کی بدولت، ہزاروں افراد پھنسنے سے بچ گئے اور علاقے کی معیشت مکمل طور پر نہیں رکی۔ یہ مثال ظاہر کرتی ہے کہ متبادل راستے کس طرح بحران میں لائف لائن کا کام کرتے ہیں۔ 

اس طرح کی قدرتی آفات سے نمٹنے کے لیے دریاوں کے دونوں اطراف مزید متبادل سڑکوں اور پلوں کی تعمیر ناگزیر ہے۔ یہ آسان آمد و رفت کے علاوہ بحران کے وقت متبادل راستوں کے طور پر لوگوں کی جان بچانے میں اہم کردار ادا کرتے ہیں۔ حکومت کو چاہیے کہ جدید ٹیکنالوجی استعمال کر کے پختہ سڑکیں اور پل بنائے، جو طویل مدتی سرمایہ کاری ثابت ہوں گے۔ مثلاً گلگت نومل سے ناصر آباد ہنزہ تک متبادل سڑک اور نگر مناپن سے ہوپر نگر تک متبادل سڑک اور بہت سے جگہوں  پرپلوں کی تعمیر انتہائی ناگزیر ہے۔ 

عوامی نمائندوں اور حکومتی اداروں کی ذمہ داری ہے کہ اس طرح کی حالات سے نمٹنے کے لیے متبادل راستوں کی تعمیر کو ترجیح دیں۔ عوامی نمائندوں کو مقتدر ایوانوں میں یہ مسئلہ اٹھانا چاہیے، فنڈز کی تخصیص کی مانگ کرنی چاہیے، اور مقامی کمیونٹیز کی آواز بننا چاہیے۔ وہ ڈیزاسٹر مینجمنٹ پلانز میں متبادل انفراسٹرکچر کو شامل کروا سکتے ہیں۔ تاہم، اکثر دیکھا گیا ہے کہ کرپشن اور عدم توجہی کی وجہ سے پروجیکٹس تاخیر کا شکار ہوتے ہیں، جو عوامی نمائندوں کی ناکامی ہے۔ ایک موثر حکمت عملی یہ ہے کہ کمیونٹی بیسڈ پلاننگ کی جائے، جہاں مقامی لوگوں کی رائے شامل ہو۔ اگر ادارے فعال ہوں تو، مستقبل میں سیلاب جیسی آفات سے ہونے والے نقصانات کو کم سے کم کیا جا سکتا ہے، اور علاقائی ترقی کو یقینی بنایا جا سکتا ہے۔

ایک رنگا رنگ گلشن کی بحالی کا سفر

 

ایک رنگا رنگ گلشن کی بحالی کا سفر

تحریر: درویش کریم، الکریم کمیونیٹی، سلطان آباد گلگت۔

سلطان آباد، گلگت ایک ایسا حسین گاوں، جو حالیہ سیلابی تباہ کاریوں کی وجہ سے ایک مشکل صورت حال کا سامنا کر رہی ہے، لیکن اس کے  باوجود بھی  اپنی دلکشی  اور حوصلے کے ساتھ سر اٹھائے کھڑا ہے۔ یہ سرزمین، جو اپنی زرخیزی اور رنگا رنگی کے لیے مشہور ہے، اب کمیونیٹی کے رضاکاروں اور مقامی حکومت کے تعاون سے نہروں کی بحالی کی جانب تیزی سے رواں دواں ہے۔ امید کی یہ کرنیں، جو دل و جان کو گرما رہی ہیں، گواہی دیتی ہیں کہ جلد ہی سلطان آباد کی پیاسی زمین کو پانی کی نعمت دوبارہ نصیب ہوگی۔ انشاءاللہ۔ یہ زمین، جو اللہ تعالیٰ کی امانت ہے، اس کی خدمت اور حفاظت ہی ہم انسانوں کا فرض ہے۔ یہ حالیہ آفت، جو ایک امتحان بن کر آئی، نہ صرف مشکلات سے دوچار کیا بلکہ کئی بیش قیمت سبق بھی  سکھا گیا۔

پہلا سبق یہ کہ قدرتی آفات جب اپنا زور دکھاتی ہیں، تو وہ نہ قوم دیکھتی ہیں، نہ مسلک، نہ زبان اور نہ ہی کوئی اور  امتیاز۔ یہ آفت سب کو یکساں اپنی لپیٹ میں لے لیتی ہے، اور اس  طرح کے حالات سے مقابلہ کرنے کے لیے اتحاد و اتفاق ہی سب سے بڑا ہتھیار   ثابت ہوتا ہے۔ سلطان آباد، جسے میں  اکثر اپنی تحریروں میں ایک رنگا رنگ گلشن سے تشبیہ دیتا رہا ہوں، واقعی ایک ایسی جنت نظیر ہے جہاں مختلف رنگ، نسل، عقائد، روایات اور زبانوں کے پھول اپنی بھرپور آب و تاب کے  ساتھ کھلے ہوئے ہیں۔ اگر کوئی باغ صرف ایک ہی قسم کے پھولوں سے سجا ہو، تو وہ خوبصورت تو ہوتا ہے، مگر جب اسی باغ میں رنگ برنگ کے پھول، مختلف خوشبوؤں اور اقسام کے ساتھ سج جائیں، تو اس کی دلکشی  میں چار چاند لگے جاتے ہیں۔ سلطان آباد بھی ایسا ہی ایک منفرد گلشن ہے، جہاں شینا، پشتو، گوجری، کھوار، واخی اور بروشاسکی کی تینوں اقسام (ہنزہ، نگر اور یاسینی) بولنے والوں کا مجموعہ ہے، جو اسے ایک عظیم ثقافتی مرکز بنادیتا ہے۔ یہ رنگا رنگی اس سرسبز قطع اراضی  کی پہچان ہے، جو اسے دوسرے علاقوں سے ممتاز  بنا دیتی ہے۔

دوسرا سبق جو اس سیلابی آفت نے ہمیں دیا، وہ ہے اتحاد و اتفاق کی لازوال طاقت۔ جب سیلابی ریلوں نے سلطان آباد کی دونوں نہروں کو اپنی لپیٹ میں لے کر تباہ کیا، تو اس علاقے کے باسیوں نے یک جان ہو کر اس کا مقابلہ کیا۔ مرد ، بزرگ و جوان اور بچوں نے اپنی اپنی بساط کے مطابق اس بحالی کے اہم  اور سخت کام میں حصہ لیا۔ یہ منظر نہ صرف قابلِ تحسین ہے بلکہ ایک ایسی مثال ہے جو آنے والی نسلوں کے لیے مشعل راہ بنے گی۔ آفرین ہے اس قوم پر، جو مشکل کی اس گھڑی میں ایک دوسرے کا سہارا بنی۔ دعا ہے کہ اللہ تعالیٰ ہمیں ہمیشہ اسی طرح ایک دوسرے کے دکھ سکھ میں شریک ہونے کی توفیق عطا فرمائے اور سلطان آباد کی تعمیر و ترقی میں اپنا کردار ادا کرنے کی ہمت بخشے۔ آمین۔

نہروں کی بحالی کا کام اب امید افزا انداز میں آگے بڑھ رہا ہے۔ دونوں نہریں جزوی طور پر بحال ہو چکی ہیں، اور انشاءاللہ جلد مکمل بحالی کی خوشخبری بھی ملے گی۔ اس قدرتی امتحان میں سلطان آباد کے باسیوں نے جس یکجہتی اور ہمت کا مظاہرہ کیا ہے، اس کا صلہ اللہ تعالیٰ نے سرخروئی اور کامیابی کی صورت میں عطا کیاہے۔ اس نعمت پر سجدہ شکر بجا لانا ہم سب پر لازم ہے۔  اس عظیم کامیابی کے جشن کے طور پر، سلطان آباد کے تمام باسیوں کو چاہیے کہ وہ ایک عظیم الشان شکرانے کی محفل سجائیں۔ اس محفل میں مرد و زن، بزرگ و جوان، بچے، سب شریک ہوں۔ نیاز کا اہتمام کیا جائے، مختلف پروگرامز ترتیب دیے جائیں، ہر قسم کے ثقافتی پروگرامز جن میں پشتو ثقافب، گوجری ثقافت، شینا ثقافت، کھوار ثقافت، واخی ثقافت، اور بروشاسکی ثقافتیں  اجاگر کی جائیں،  اور پورا دن خوشیاں بانٹتے ہوئے گزرے۔ یہ محفل نہ صرف ہمارے اتحاد کی عکاسی کرے گی ،بلکہ اس عہد کی تجدید کا موقع بھی فراہم کرے گی کہ ہم ایک تھے، ایک ہیں، اور انشاءاللہ ہمیشہ ایک رہیں گے۔ اس موقع پر ایک دوسرے کو مبارکبادیاں دی جائیں، ایک دوسرے کی  خوشیوں میں شریک ہوا جائے، اور اس سرزمین کی ترقی و خوشحالی کے لیے  سب مل کر دعائیں مانگی جائیں۔ اور اگر ہو سکے تو اسی طرح کے  شکرانے کی محفل و ثقافتی میلہ ہر سال سجانے کا اہتمام  کیا جائے۔

اے اللہ،  تو اس سرزمین کو اپنی رحمتوں سے نواز دے، اس کے باسیوں کو ہمیشہ متحد رکھ، اور انہیں ہر مشکل سے نکالنے کی  اعلی توفیق عطا فرما۔ سلطان آباد کا یہ رنگا رنگ گلشن ہمیشہ اپنی دلکشی  اور سرخروئی کے ساتھ چمکتا رہے، اور اس کے باسی اپنے اتحاد و محبت کی بدولت ہر امتحان میں سرخرو ہوں۔ آمین، یا رب العالمین۔

 

سلطان آباد کی بقا کی جنگ

 

سلطان آباد کی بقا کی جنگ

تحریر: درویش کریم، الکریم کمیونیٹی، سلطان آباد، گلگت۔

سلطان آباد، گلگت بلتستان کا ایک خوبصورت قصبہ، جو کبھی اپنی مثالی ہم آہنگی اور سرسبز زراعت کے لیے جانا جاتا تھا، آج ایک تباہ کن سیلاب کی زد میں ہے۔ یہ قصبہ، جہاں مختلف اقوام، خاندانوں اور روایات کا خوبصورت امتزاج آباد ہے، دہائیوں سے محبت، امن اور یکجہتی کی علامت رہا ہے۔ تقریباً 1500 گھرانوں پر مشتمل یہ آبادی اپنی روزی روٹی کے لیے زراعت، پھل دار درختوں اور جنگلات پر انحصار کرتی ہے۔ 11 ہزار کنال اراضی کو سیراب کرنے کے لیے سلطان آباد نالے سے دو نہریں نکالی گئی ہیں، جن سے 7000 کنال پر زرعی اجناس اور پھل دار درخت جبکہ 4000 کنال پر عمارتی لکڑی اور جنگلی درخت اگائے گئے ہیں۔ ایک  محتاط اندازے کے مطابق یہاں 60 ہزار سے زائد پھل دار درخت اور 3 لاکھ سے زیادہ جنگلی اور عمارتی درخت موجود ہیں، جو اس خطے کی زرخیزی اور معاشی استحکام کی بنیاد ہیں۔

تقریباً دو ہفتے قبل، سلطان آباد نالے میں ایک غیر معمولی شدت کا سیلاب آیا، جس کا کوئی ریکارڈ ماضی میں موجود نہیں۔ اس بے رحم سیلاب نے نہ صرف نالے کے کناروں پر واقع آبادیوں کو تہس نہس کیا بلکہ پانی کی دونوں نہریں اور پینے کے پانی کا ترسیلی نظام بھی مکمل طور پر تباہ کر دیا۔ یہ پانی، جو 11 ہزار کنال اراضی کی آبپاشی اور انسانی بستیوں کی بقا کا واحد سہارا تھا، اب ملبے اور پتھروں کی قید میں ہے۔ یہ محض ایک قدرتی آفت ہی  نہیں، بلکہ سلطان آباد کے باسیوں کے وجود کے لیےبھی  ایک سنگین خطرہ ہے۔

سلطان آباد کے باسی اپنی بقا کی جنگ لڑ رہے ہیں۔ وہ دن رات نہروں کی بحالی کے لیے کام کر رہے ہیں، لیکن نقصان کا دائرہ اتنا وسیع ہے کہ مقامی وسائل اس کے مقابلے میں ناکافی ہیں۔ 11 ہزار کنال اراضی، جسے آباد کرنے میں ایک صدی کی محنت لگی، دوبارہ بنجر ہونے کے خطرے سے دوچار ہے۔ کمیونٹی متحد ہو کر ملبہ صاف کرنے اور نہروں کی بحالی کے لیے جدو جہد کر رہی ہے، لیکن بھاری مشینری، دھماکہ خیز مواد، اسٹیل، سیمنٹ اور ہنرمند مزدوروں کی کمی ایک بڑا چیلنج ہے۔

قدرتی آفات جیسے سیلاب جب پانی کے ترسیلی نظام کو متاثر کرتے ہیں، تو مقامی حکومتوں، سیاسی نمائندوں، حکومتی اور غیر حکومتی اداروں کو اپنی ذمہ داریاں ادا کرنی ہوتی ہیں،  مثلاً  مقامی حکومتیں، فوری طور پر صاف پانی کی فراہمی کے لیے واٹر ٹینکرز اور بوتل بند پانی کی تقسیم کا انتظام ،  متاثرہ واٹر سپلائی سسٹم کی مرمت یا عارضی متبادل نظام قائم  کرنا،  اور اس طرح  سیاسی نمائندے، متاثرین کی آواز حکومتی ایوانوں تک پہنچانا اور فوری امداد کے لیے دباؤ ڈالنا،  حکومتی فنڈز اور امدادی پیکجز کو شفاف طریقے سے متاثرین تک پہنچانے میں کردار ادا کرنا شامل ہیں۔  اب دیکھنا یہ ہے کہ اس مصیبت کی گھڑی میں کون کون سلطان آباد کے مکینوں کے ساتھ کھڑے ہیں، کیونکہ مصیبت میں کام آنے والے ہی ہمیشہ یاد رہتے ہیں۔

یہاں پر یہ بات یاد دلانا انتہائی ضروری ہے کہ سلطان آباد کے باسیوں نے ہمیشہ  حکومتی سطع پر ترقیاتی منصوبوں میں بغیرکسی  معاوضے کے اپنا حصہ ڈالا ہے۔ انہوں نے 700 کنال اراضی دانش اسکول، 200 کنال فیملی پارک، اور 50 کنال گورنمنٹ گرلز کالج کے لیے وقف کی ہے۔ یہ مثالیں اس کمیونٹی کی قربانیوں اور حکومتی اقدامات کے ساتھ تعاون کی عکاس ہیں۔ آج یہ باسی مقامی حکومت، سیاسی نمائندوں اور مخیر حضرات سے امداد کے منتظر ہیں۔

اس وقت ہنگامی بنیادوں پر 1500 فٹ نہر کی فوری بحالی کے لیے 24 انچ کے پائپ، ضروری لوازمات اور ہنرمند مزدوروں کی ضرورت ہے تاکہ ہفتہ دس دنوں میں پانی کی ترسیل بحال ہو اور اراضی کو سوکھنے سے بچایا جا سکے۔ جبکہ طویل مدتی  بنیادوں پر  30 دن کے اندر نئی سڑک اور نہر کی تعمیر کے لیے دھماکہ خیز مواد، اسٹیل، سیمنٹ اور ہنرمنددرکار ہیں۔ فلڈ پروف پائپ لائنز اور واٹر اسٹوریج کی مضبوط سہولیات مستقبل میں آفات سے بچاؤ کے لیے ناگزیر ہیں۔ اس وقت سلطان آباد کے باسی اپنی بقا کی جنگ لڑ رہے ہیں، لیکن ان کی جدوجہد تنہا ناکافی ہے۔ مقامی حکومت، سیاسی نمائندوں اور این جی اوز کی فوری اور مربوط امداد اس مثالی گاؤں کو دوبارہ سرسبز بنانے کے لیے ناگزیر ہے۔ یہ وقت ہے کہ ہم سب مل کر اس کمیونٹی کی مدد کریں، جو نہ صرف اپنی بقا کے لیے لڑ رہی ہے بلکہ گلگت بلتستان کی زرعی معیشت اور ماحولیاتی توازن کے لیے بھی اہم ہے۔

 

شکران نعمت و کفران نعمت

 

شکران نعمت و کفران نعمت

تحریر: درویش کریم، الکریم کمیونیٹی، سلطان آباد، گلگت

میں گزشتہ سترہ برسوں سے دنیور محمد آباد اور سلطان آباد کی سرزمین پر رہائش پذیر ہوں۔ 2009 سے 2016 تک دنیور محمد آباد میرا ٹھکانہ رہا، اور پھر 2016 سے اب تک سلطان آباد میں مقیم ہوں۔ ان برسوں میں پینے کے پانی کے حوالے سے جو تجربہ میرا  رہا ہے، وہ یوں ہے کہ ہمارے گھروں تک سرکاری پائپ لائنوں کے ذریعے دنیور نالے کا پانی پہنچتا تھا۔ یہ پانی موسموں کے رنگ ڈھنگ کے ساتھ اپنا رنگ و روپ بھی  بدلتا رہتا ہے۔ گرمیوں میں خاص طور پر یہ اتنا گدلا ہوتا  ہے ،کہ اسے پینا محض اکتفا کا نام تھا۔ لیکن ہم سب اسی پانی کو پینے پر مجبور تھے۔ 

میں کبھی سلطان آباد اور  دنیور نالے کے اندر  موجود حیشی نامی  اس خوبصورت چگہے پر تو  نہیں جا سکا ہوں، البتہ، سنا ہے کہ یہ ایک دلفریب چراگاہ ہے، جہاں ہر طرف ہریالی کا راج ہے اور  انتہائی پاک و صاف  اور بلکل شفاف چشمے  بہتے ہیں۔ یہ چراگاہ گویا رب  کریم کی رحمتوں کا ایک عظیم مظہر ہے۔علاقے کے بڑے بزرگ بتاتے ہیں کہ پرانے زمانوں میں جب کوئی مرض لاعلاج ٹھہرتا، تو خلیفہ اور اخون حضرات اسی حیشی کے چشموں کا پاکیزہ پانی لانے کا حکم دیتے۔ اس پانی پر دم دعا کے بعد مریض کو پلایا جاتا، تو گویا مرض دم توڑ دیتا اور شفا مل جاتی۔ 

شکر ہے ربِ کریم کا کہ گزشتہ کئی برسوں سے حکومتِ گلگت بلتستان اور آغا خان ڈیولپمنٹ نیٹ ورک کے ذیلی ادارے ’واسپ‘ کی کاوشوں سے  اسی حیشی کے ان شفاف چشموں کا پانی پائپ لائنوں کے ذریعے سلطان آباد، دنیور، اور محمد آباد کے ہر گھر تک پہنچایا گیا۔ یہ پانی نہ صرف پاکیزہ ہے بلکہ زندگی کو سہارا دینے والا بھی  ہے۔ مگر اس سال گرمیوں کے موسم نے ان دیہاتوں کے باسیوں کو زندگی کے ایک تلخ موڑ لا کھڑا کیا ہے۔ ایک بے رحم سیلاب نے نہ صرف  کناروں پر موجود آبادیوں  کو تہس نہس کیا، بلکہ واٹر چینلز اور  چشمے کےپانی کی ترسیل کے نظام کو بھی درہم برہم کر دیا۔ یہ پانی، جو کھیتوں اور گھروں کی جان تھا، اب ملبے اور پتھروں کی قید میں جا چکا ہے۔  پوری کمیونیٹی واٹر چینلز اور پائپ لائنوں کی بحالی کے لیے دن رات  سرگرداں ہے۔ کچھ لوگ رضاکارانہ طور پر روزانہ نالے میں نہروں کی صفائی میں جتے  ہوئےہیں، تو کچھ عمائدین و سرکردگان سرکاری و غیر سرکاری اداروں کے دروازوں پر دستک دے رہے ہیں،  اور امداد کی امید میں اپنی بے بسی کی داستانیں سنا رہے ہیں۔ ہمیں یقین ہے کہ کمیونیٹی کی مشترکہ جدوجہد اور اداروں کی مدد سے یہ آفت جلد ٹل جائے گا، اور پانی کی ترسیل دوبارہ شروع ہو جائے گا۔ 

مگر اس موقع پر ہمیں ٹھہر کر سوچنا ہوگا۔ سلطان آباد، دنیور، اور محمد آباد کےتمام باسیوں کو اپنے اپنے  گریبانوں میں جھانکنا ہوگا۔عام عوام و خواص کو اپنے آپ سے کچھ سوالات  پو چھنے ہونگے۔ کیا ہم نے اس نعمت کی قدر کی؟ کیا ہم نے شکرانِ نعمت ادا کیا یا کفرانِ نعمت کے مرتکب ہوئے؟ ان نالوں  کو روائتی طور پر ہمیشہ سے پاک و صاف اور مقدس تصور کیا جاتا ہے، کیا ہم نے اس کا خیال رکھا؟  یہ پاک و  صاف   اور پرتاثیر شفاف پانی، جو خاص طور پر پینے کے لیے ہم تک پہنچایا گیا تھا، کیا ہم نے اسے بے جا استعمال تو نہیں کیا؟ کیا ہم نے اسے غیر ضروری طورکھیتوں، کیاریوں اور نہروں میں ضائع  تو نہیں کیا؟پانی کا تقسیم برابری کے بنیاد پر کیا  یا کچھ گھروں  اور علاقوں میں یہ پانی چند گھنٹوں سے زیادہ میسر نہ تھا؟ کیا ہم نے پانی کے استعمال کے لیے مقررہ فیس  جو پورا مہینے کے لیے صرف سیکڑوں میں ہے ، ادا کی، یا اسے نظر انداز کر دیا؟  جبکہ آج ہم دو ہزار سے زیادہ رقم  ادا کر کے پانی کا ٹینکر تو منگوا رہے ہیں جو مشکل سے ایک ہفتہ سے کم وقت میں ختم ہو جاتا ہے،  اس طرح کے اور کئی کئی سوالات ہو سکتے ہیں، اور دیگرقارئین کے زہنوں میں  بھی سوالات ہو سکتے ہیں، کسی کو جواب دینے کی چنداں ضرورت نہیں ہے، بلکہ ہم سب کو اپنے اپنے تعین اس  صورت حال کو سدھارنے کی ضرورت ہے۔  آئیے ہم سب غور کریں اور  آج سے مستحکم ارادہ کر لیں کہ  اس نعمت کی قدر کریں گے، تاکہ رب  کریم کی رحمت ہم پر دوبارہ سایہ فگن ہو۔ نہیں تو   بقول مرزا غالب  کے کہ:

آپ ہی اپنے اداؤں پہ زرا غور کرو،

ہم اگر کہہ دیں گے تو شکایت ہوگی